Ushtria amerikane njoftoi të dielën se ka vrarë 37 militantë, të lidhur me grupin ekstremist Shteti Islamik dhe Al-Qaedën, në dy sulme ajrore të zhvilluara në Siri. Mes të vrarëve, dy ishin militantë të lartë, sipas informacionit nga Komanda Qendrore e SHBA-së.

Sulmet ajrore u përqendruan në veriperëndim të Sirisë, ku forcat amerikane qëlluan ndaj një lideri të rëndësishëm të grupit të lidhur me Al-Qaedën, Hurras al-Deen, së bashku me tetë militantë të tjerë, të cilët ishin përgjegjës për udhëheqjen e operacioneve ushtarake të këtij grupi.

Përveç kësaj, më 16 shtator, ushtria amerikane krye një sulm tjetër ndaj një kampi stërvitor të Shtetit Islamik në një lokacion të largët në Sirinë qendrore, ku u vranë 28 militantë, përfshirë të paktën katër liderë sirianë. “Sulmi ajror do t’ia pamundësojë Shtetit Islamik të kryejë operacione kundër interesave amerikane, si dhe ndaj aleatëve dhe partnerëve tanë,” thuhet në njoftimin e ushtrisë.

Aktualisht, rreth 900 trupa amerikane ndodhen në Siri, së bashku me një numër të pazbuluar të kontraktuesve, për të parandaluar rikthimin e Shtetit Islamik, i cili kishte shkaktuar kaos në Irak dhe Siri që nga viti 2014, duke marrë nën kontroll pjesë të mëdha të territorit.

Forcat amerikane i ofrojnë këshilla dhe ndihmë aleatëve të tyre kryesorë në verilindje të Sirisë, Forcat Demokratike të Sirisë të udhëhequra nga kurdët, të cilat operojnë afër zonave strategjike ku grupet militante të mbështetura nga Irani kanë prani.