Një rast i dyshuar keqtrajtimi është raportuar në veri të Barit, ku një vajzë 13-vjeçare ka telefonuar në numrin e urgjencës për fëmijët, 114, pas një debati me babanë e saj, i cili i hoqi lidhjen e internetit. Pas denoncimit, ka nisur një hetim i thelluar nga autoritetet, duke përfshirë policinë, shërbimet sociale dhe departamentin e neuropsikiatrisë për fëmijët pranë autoritetit shëndetësor lokal Barletta-Andria-Trani.

Ekspertët që analizuan situatën kanë zbuluar se vajza kishte një varësi të fortë nga celulari, të cilin e përdorte deri në dhjetë orë çdo ditë, dhe kjo ka pasur një ndikim negativ në rezultatet e saj shkollore, duke shkaktuar konflikte me prindërit për notat. Sipas hetuesve, heqja e telefonit ka qenë një pasojë e debatesh të shumta me prindërit, dhe tani po hetohet nëse ky incident ishte pjesë e një rritje të sjelljeve ndëshkuese ndaj saj. Çështja është aktualisht në hetim nga prokuroria e Tranit.