Pas humbjes së betejës së opozitës në Kolegjin Zgjedhor, Vangjel Tavos do t’i jepet zyrtarisht mandati si kryebashkiak i Himarës. Komisioni Qendror i Zgjedhjeve (KQZ) do të mblidhet nesër, më 12 shtator 2024, në orën 10:30, për të dhënë zyrtarisht mandatin e kryebashkiakut, duke i hapur rrugë betimit të tij në Këshillin Bashkiak.

Sipas njoftimit zyrtar të KQZ-së: “Komisioneri Shtetëror i Zgjedhjeve zhvillon seancë publike ditën e Enjte, datë 12 shtator 2024, ora 10:30. Projektvendim ‘Për dhënien e mandatit të Kryetarit të Bashkisë Himarë, Qarku Vlorë, z. Vangjel Tavo, i propozuar nga subjekti zgjedhor ‘Partia Socialiste e Shqipërisë’, për zgjedhjet e pjesshme për Kryetar të Bashkisë Himarë të datës 4 gusht 2024.'”

Zgjedhjet në Himarë, të zhvilluara më 4 gusht 2024, u certifikuan nga Komisioni i Ankesave dhe Sanksioneve (KAS) dhe Kolegji Zgjedhor, të cilët vlerësuan se rezultati ishte i pakontestueshëm, duke mos konstatuar shkelje që mund të ndikonte rezultatin zgjedhor. Vangjel Tavo, kandidati i Partisë Socialiste, fitoi me një diferencë prej 1477 votash ndaj rivalit opozitar Petro Gjikuria.