Një vatër e murtajës afrikane është identifikuar në zonën e Malit të Rrencit në Lezhë, ku derrat janë prekur nga kjo sëmundje. Sipas informacionit të Shërbimit të Veterinarisë, deri tani janë raportuar të paktën 10 krerë derrash të ngordhur, pesë nga të cilët në një fermë dhe pesë të tjerë përgjatë masivit pyjor të kësaj zone.

Pasi u identifikuan rastet e sëmundjes, Shërbimi i Veterinarisë ka ndërmarrë menjëherë masa dhe ka kryer analizat, duke konfirmuar se derrat kanë ngordhur nga murtaja afrikane. Si rezultat, zona është futur në karantinë dhe po kryhen verifikime për të kontrolluar përhapjen e mëtejshme të sëmundjes.

Shërbimi veterinar nuk ka dhënë informacione të tjera në lidhje me situatën, ndërsa ekspertët e shëndetit publik theksojnë se murtaja afrikane është një sëmundje që prek vetëm derrat e butë dhe të egër. Megjithatë, nuk ka asnjë konfirmim që kjo sëmundje mund të transmetohet tek njerëzit ose kafshët e tjera.