Ish-kryeministri dhe kreu aktual i Partisë Demokratike, Sali Berisha, gjatë një interviste për emisionin “Quo Vadis” ka bërë akuza të rënda ndaj kryeministrit Edi Rama dhe mazhorancës, duke përmendur përgjimet e platformës “EncroChat”, që sipas tij përmbajnë emra të zyrtarëve më të lartë të Shqipërisë të cilët kanë kontakte të drejtpërdrejta me krimin e organizuar.

“Vetëm maja e ajsbergut ka dalë dhe del se Taulant Balla, Edi Rama janë të lidhur me vrasës, me trafikantë, akuzohen për vrasje, për porosi vrasjes, për trafiqe. Është jetike që të zbardhet e vërteta e lidhjes së politikës me krimin”, tha Berisha.

“Ju e patë publikimin e fundit të gazetarit Elton Qyno, i cili faktonte nga bisedat e bëra midis bandave se porositësi i vrasjes së Ervis Martinajt ishte vetë Rama. “E ke politike”, i thoshte Bajraj Ervis Martinajt dhe ky i thoshte se “partia jote po më dënon. Pasi Rama e paralajmëroi se ta dimë targën dhe ta do merrem personalisht, Rama angazhoi policinë mbase si ekzekutorë, mbase kanë qenë banditë. Ai u nda në fund me një oficer politie. Kemi të bëjmë me një vrasje shtetërore, ekstraligjore, ekstrakushtetuese”, dekalroi Berisha.

Ai përmendi një bisedë midis Ervis Martinajt dhe Bajrajit, ku Martinaj thoshte se po dënohej nga “partia jote”, duke nënkuptuar ndëshkimin e tij për arsye politike. Berisha kujtoi edhe një deklaratë të mëparshme të kryeministrit Rama, ku ai e kishte paralajmëruar Martinajn me fjalët “ta dimë targën dhe do merrem personalisht me ty”. Sipas Berishës, për këtë vrasje ishte angazhuar policia, ndoshta si ekzekutore, ose ndoshta ishin përdorur edhe banditë të lidhur me shtetin.

Berisha e cilësoi këtë vrasje si një akt shtetëror, ekstraligjor dhe ekstrakushtetues, duke akuzuar drejtpërdrejt qeverinë për vrasjen e Martinajt.