Një ngjarje tragjike ka tronditur këtë të mërkurë kryeqytetin. Një punonjës i Gardës së Republikës është gjetur i vetëvrarë në makinën e tij, pranë banesës ku jetonte në Tiranë.

Viktima është identifikuar si G. Lelçaj, punonjës i strukturave të Gardës, ndërsa sipas të dhënave paraprake, ai i ka dhënë fund jetës me armën e shërbimit, brenda garazhit të makinës.

Burime nga grupi hetimor bëjnë me dije se efektivi ishte në proces divorci me bashkëshorten, ndërsa hetimet për zbardhjen e rrethanave të plota të ngjarjes vijojnë.

Policia ndodhet në vendngjarje dhe po punon për të sqaruar motivet që e çuan efektivin në aktin ekstrem. Trupi i pajetë i të ndjerit është transportuar në Institutin e Mjekësisë Ligjore për autopsinë.

Ngjarja ka ngjallur reagime të shumta dhe shqetësim në radhët e strukturave të sigurisë, ku një tjetër rast i rëndë sjell në vëmendje nevojën për mbështetje psikologjike për punonjësit e strukturave të armatosura, sidomos ata që përballen me ngarkesa të larta emocionale apo situata personale të vështira.