DURRËS – Vijojnë operacionet e njëpasnjëshme të Policisë së Durrësit për goditjen e veprimtarive të paligjshme të prostitucionit në zonat turistike. Pas një hetimi dyjavor të ndjekur me metoda proaktive, është finalizuar me sukses operacioni i koduar “Baza”, në kuadër të të cilit u zbuluan dhe goditën aktivitetet e një baze prostitucioni në Qerret të Kavajës.

Në përfundim të veprimeve hetimore, specialistët për Hetimin e Trafiqeve të Paligjshme dhe ata të Komisariatit të Policisë Kavajë arrestuan në flagrancë dy shtetase kineze:
– C. Y., 42 vjeçe
– Y. Sh., 41 vjeçe

Të dyja akuzohen për veprën penale “Prostitucioni”.

Po ashtu, u proceduan penalisht në gjendje të lirë 6 shtetas shqiptarë, të cilët dyshohet se kanë përfituar shërbime seksuale kundrejt pagesës.

Sipas hetimeve, dy gratë e huaja kishin marrë me qira një apartament në zonën turistike të Qerretit, ku zhvillonin aktivitetin e paligjshëm. Përmes rrjeteve sociale, ato reklamonin shërbimet e tyre dhe siguronin klientë, me çmime që varionin nga 80 deri në 200 euro për seancë.

Edhe pse kishin hyrë në Shqipëri me status turistik, ato rezultuan të përfshira në një aktivitet kriminal me synim përfitime financiare.

Gjatë operacionit, Policia sekuestroi në cilësinë e provës materiale:
– shuma parash në euro dhe dollarë,
– dy telefona celularë, që shërbenin për komunikime me klientët.

Materialet procedurale janë referuar Prokurorisë së Durrësit, që pritet të ndërmarrë veprime të mëtejshme ligjore.

Policia e Durrësit thekson se operacionet për goditjen e prostitucionit do të vijojnë edhe në ditët në vijim, sidomos në zonat bregdetare ku vërehet shtim i lëvizjes turistike.