TIRANË – Një tjetër rast suksesi i Policisë së Tiranës është shënuar ditën e sotme, me finalizimin e operacionit të koduar “November”, që çoi në arrestimin e një 49-vjeçari të shpallur në kërkim për një vjedhje me pasoja të rënda, të ndodhur në nëntor të vitit të kaluar.

Shtetasi A. Ç., 49 vjeç, u lokalizua dhe u vu në pranga nga shërbimet e Komisariateve të Policisë Nr. 1 dhe Nr. 6, pas një hetimi intensiv dhe administrimi të informacionit të siguruar në rrugë operative për vendndodhjen e tij.

Ky shtetas dyshohet se, në bashkëpunim me shtetasin Xh. C. (i arrestuar më herët) dhe një person tjetër ende në kërkim, kanë hyrë në një banesë në nëntor të vitit 2024, prej nga ku kanë vjedhur 30 000 euro cash si dhe sende me vlerë të konsiderueshme.

Gjykata e Tiranës i ka caktuar A. Ç. masën e sigurisë “Arrest në burg”, për veprën penale “Vjedhja me pasoja të rënda, kryer në bashkëpunim”.

Policia njofton se vijojnë kërkimet për kapjen e bashkëpunëtorit të tretë të dyshuar në këtë ngjarje, ndërkohë që materialet procedurale i janë referuar Prokurorisë së Tiranës për veprime të mëtejshme.

Operacioni “November” konsiderohet një goditje e rëndësishme ndaj kriminalitetit kundër pronës në kryeqytet.