Livorno, Itali, 2025 – Një ngjarje e frikshme e ngjashme me një skenë filmi ka ndodhur pranë Livornos, në bypass-in Aurelia në San Vincenzo. Një grup i armatosur ka sulmuar dy furgona të blinduar të kompanisë italiane Battistolli, të cilët po transportonin paratë e pensioneve në zonën e Grosseto-s.

Sipas raporteve të mediave vendase, grabitësit sulmuan furgonat gjatë pasdites së sotme, duke krijuar një atmosferë paniku dhe të tensionuar në rrugë. Në një video të publikuar nga Presidenti i Qarkut, Eugenio Giani, shfaqen momentet dramatike të bandës në aksion. Dëgjohen të shtëna, ndërsa grabitësit djegin një nga furgonat dhe arratisen me tri makina të tjera.

Në një periudhë shumë të shkurtër, ata arritën të grabisin paratë, ndërsa policia, ambulancat dhe zjarrfikësit mbërritën menjëherë në vendngjarje. Fatmirësisht, nuk raportohet për të lënduar nga ngjarja, megjithatë ngjarja ka shkaktuar një alarm të madh në qytet dhe në zonat përreth.

Aktualisht, policia italiane është angazhuar për të identifikuar dhe kapur autorët e kësaj ngjarjeje të rëndë, ndërkohë që hetimet vazhdojnë për të zbuluar detaje të tjera rreth mënyrës se si operoi banda dhe paratë që ata mund të kenë grabitur.