Një mjet është djegur gjatë natës në qytetin e Korçës,ngjarja është e qëllimshme. Pronari i mjetit është shtetasi Klodian Cacani, i cili nuk njihet si person me precedentë penalë.

Faxweb.al ka siguruar pamjet e kamerave të sigurisë, ku shihet një person që i ve zjarrin mjetit, duke i hedhur lëndë djegëse, ndërsa ka marrë dëmtime gjatë vendosjes së zjarrit.

Deri më tani autori nuk është identifikuar, dhe nuk është paraqitur për ndihmë në asnjë spital të juglindjes.

Familja e pronarit të mjetit deklaron se nuk kanë konflikte me askënd, dhe nuk kanë dhënë ndonjë pistë të mundshme hetimesh për punonjësit e policisë.

Policia njofton zyrtarisht se në datë 06.04.2023, rreth orës 01:10, pranë vendit të quajtur “Ura e fajancës”, ka rënë zjarr në automjetin tip “Benz” në pronësi të shtetasit K. C., banues në Korçë, i cili ishte i parkuar.

Grupi hetimor po punon për zbardhjen e rrethanave të ngjarjes dhe përcaktimin e shkaqeve të rënies së zjarrit.