Tensionet në Lindjen e Mesme kanë marrë një tjetër kthesë dramatike, pasi Izraeli kreu sulme ajrore të reja në qendër të Damaskut, duke goditur disa objekte të ndjeshme të qeverisë siriane, përfshirë pallatin presidencial, Ministrinë e Mbrojtjes, si dhe ndërtesën e televizionit shtetëror.

Një video tronditëse, e cila është bërë virale brenda pak minutash, tregon momentin kur një spikere lajmesh largohet në panik nga studioja gjatë një transmetimi të drejtpërdrejtë, në momentin që një predhë izraelite godet afër ndërtesës ku ajo ndodhej.

Ministri izraelit i Mbrojtjes, Israel Katz, ka reaguar publikisht, duke paralajmëruar se “paralajmërimet kanë mbaruar” dhe tani do të ketë “goditje të dhimbshme” ndaj objektivave në Siri. Në një postim në rrjetet sociale, ai konfirmoi gjithashtu se ushtria izraelite do të vazhdojë operacionet në rajonin e Suweidës, në jug të Sirisë, ku përplasjet midis komunitetit Druze dhe grupeve të armatosura janë intensifikuar.

Katz theksoi se Forcat Mbrojtëse Izraelite (IDF) janë të angazhuara për mbrojtjen e komunitetit Druze edhe përtej kufirit dhe se ai dhe kryeministri Netanyahu do të mbajnë premtimin ndaj këtij komuniteti.

Ky është sulmi i tretë radhazi i Izraelit në territorin sirian, duke shënuar një përshkallëzim serioz të situatës në rajon. Më herët gjatë ditës, edhe ndërtesa e Ministrisë së Mbrojtjes në Damask ishte shënjestruar nga një tjetër sulm ajror.

Situata në Siri mbetet tepër e brishtë, ndërsa komuniteti ndërkombëtar shpreh shqetësim për rritjen e përshkallëzimit ushtarak mes Izraelit dhe aleatëve të regjimit sirian.