Policia e Vlorës ka ekzekutuar 11 masa sigurie “Arrest në burg” për anëtarët e një grupi kriminal që shiste lëndë narkotike, kryesisht kokainë dhe kanabis, në Sarandë dhe Delvinë. Gjatë operacionit, janë arrestuar shtetasit Mili Hamzaj, Evinio Hamzaj, Fatjon Abazi, Osmën Abazi, Xhuljan Meçani, Stelio Meçani, Eduart Taka, Juxhin Isufi, Drago Qëndro, Enver Haxhi dhe Mina Dedi, ndërsa Algert Caushi u arrestua në kushtet e flagrancës.

Në operacion, policia ka sekuestruar 120 doza kokaine, doza kanabisi, 18 aparate celularë, 1 tablet, 4 automjete, 2 motomjete, 2 radio si ato të Policisë, 2 shkopinj metalikë, 2 peshore elektronike dhe një shumë parash e dyshuar e përfituar nga ky aktivitet kriminal, që arrin në 40,000 euro, 2,980 dollarë, 260 paund dhe 1,940,000 lekë.

Grupi kriminal akuzohet për prodhimin dhe shitjen e narkotikëve, kryer në bashkëpunim. Hetimet për këtë aktivitet vazhdojnë nën drejtimin e Prokurorisë, me qëllim dokumentimin e plotë të veprimtarisë kriminale dhe identifikimin e të tjerë individëve të përfshirë.