Minuta e 95-të e ndeshjes mes Rumanisë dhe Kosovës në Bukuresht shënoi momentin kur ekipi kosovar u tërhoq nga fusha e lojës për shkak të thirrjeve anti-shqiptare dhe mbështetjes për Serbinë nga tifozët vendas. Thirrjet “Serbia, Serbia” filluan të dëgjoheshin nga tribunat, duke sjellë një reagim të menjëhershëm nga lojtarët e Kosovës. Kapiteni Amir Rrahmani ishte i pari që udhëhoqi ekipin drejt dhomave të zhveshjes, në një akt proteste ndaj provokimeve.
UEFA kishte paralajmëruar më herët Federatën Rumune se do të përballej me pasoja të rënda nëse tifozët e saj, të cilët në të kaluarën kanë shfaqur sjellje anti-shqiptare, do të përsërisnin akte të tilla. Incidentet e minutës së 93-të, ku u shfaq një përplasje verbale mes Rrahmanit dhe një lojtari rumun, përshpejtuan tensionet në fushë. Kjo u pasua nga thirrjet raciste që përshkuan tribunat, duke e bërë të pamundur vazhdimin e lojës.
Në përgjigje të provokimeve, lojtari Mërgim Vojvoda iu kundërpërgjigj tifozëve me gjestin e shqiponjës, simboli i flamurit kombëtar shqiptar, për të treguar krenari dhe solidaritet. Futbollistët e Kosovës, të indinjuar nga atmosfera armiqësore, refuzuan të kthehen në fushë për të luajtur minutat e mbetura. Gjyqtari kryesor bëri thirrje të dy skuadrave që të zbrisnin në fushë për të përfunduar ndeshjen, por vetëm ekipi rumun iu bind thirrjes.
Kështu, ndeshja u ndërpre me rezultatin e barabartë 0-0. Tashmë pritet vendimi zyrtar i UEFA-s lidhur me rezultatin përfundimtar dhe masat disiplinore që do të merren ndaj Federatës Rumune për shkak të sjelljeve të tifozëve. Incidenti ndodhi në një moment delikat të ndeshjes, teksa po luhej koha shtesë.
