Një magazinë në Vorë u zbulua si qendër e falsifikimit të datave të skadencës për produkte ushqimore, të cilat më pas rishpërndaheshin në treg, duke rrezikuar seriozisht shëndetin e konsumatorëve. Skandali përfshin kompaninë “Master AL”, ndaj së cilës janë marrë masa të menjëhershme nga autoritetet.
Në pranga:
• Florenc Domi, 38 vjeç – administrator i kompanisë
• Agim Domi, 58 vjeç – magazinier
Të proceduar penalisht:
• S. T., 56 vjeç – ortak i kompanisë
• A. D., 36 vjeç – shofer
Të katërtit përballen me disa akuza të rënda:
• “Shkelja e të drejtave të pronësisë industriale”
• “Falsifikimi i vulave, stampave ose formularëve”
• “Fshehja e të ardhurave”
• “Mospagimi i taksave dhe tatimeve”
• “Punësim i paligjshëm”
• “Importi, prodhimi, shitja, ruajtja e ushqimeve të rrezikshme për shëndetin ose jetën e njerëzve”
Skema kriminale:
Produktet e skaduara, kryesisht të datës janar dhe shkurt 2025, grumbulloheshin nga tregtarë të zonave Tiranë, Durrës dhe Elbasan. Pas manipulimit të etiketave të skadencës në magazinën në Vorë, ato shpërndaheshin sërish në supermarkete dhe dyqane, pa asnjë dokument tatimor.
Operacioni “Siguria Ushqimore” u zhvillua nga Sektori për Hetimin e Krimit Ekonomik dhe Financiar në bashkëpunim me Komisariatin nr. 7 në Tiranë. Gjatë kontrollit, u sekuestruan 716 koli dhe dhjetëra kilogramë mallra ushqimore me data të falsifikuara.
Policia dhe autoritetet hetimore kanë nisur procedurat për ndjekje të mëtejshme penale në bashkëpunim me Prokurorinë e Tiranës. Po ashtu, qytetarët ftohen të raportojnë çdo rast të ngjashëm në numrin falas 112, duke ndihmuar në mbrojtjen e shëndetit publik.
