Një video që po qarkullon me shpejtësi në internet ka kthyer vëmendjen drejt një ngjarjeje të papritur në koncertin e grupit të famshëm “Coldplay” në Boston, ku CEO i kompanisë “Astronomer”, Andy Byron, dhe shefja e Burimeve Njerëzore, Kristin Cabot, janë kapur në një moment të ndjeshëm, teksa kamera i fokusoi të përqafuar.

Videoja u regjistrua nga Grace Springer, 28-vjeçarja nga New Jersey, një fans e zjarrtë e grupit, e cila udhëtoi me miqtë për të ndjekur koncertin live. Ajo rrëfen se nuk e priste që ky moment do të shkaktonte një bujë të tillë online, duke grumbulluar më shumë se 46 milionë shikime dhe mbi 4.9 milionë pëlqime.

Momenti kur kamera u kthye kah Byron, i cili është i martuar dhe ka dy fëmijë, shkaktoi reagime të papritura: CEO u përpoq të fshihej pas një barrierë, ndërsa Cabot dukej e turpëruar dhe mbuloi fytyrën me duar.

Grace tregoi për “The Sun” ndjesitë e saj pas përhapjes së videos: “Një pjesë e imja ndihet keq që ua ndryshoj jetën këtyre njerëzve, por ata po luajnë lojëra të rrezikshme… fitojnë çmime budallaqe”. Ajo shprehu gjithashtu shpresën që bashkëshortja e Byron të gjejë forcën dhe lumturinë që meriton, duke e quajtur videon një “bekim të maskuar”.

Pas postimit të videos në orët vonë të natës, Grace u befasua nga numri i madh i shikimeve që mori gjatë natës, duke u zgjuar me më shumë se 7 milionë shikime dhe një valë diskutimesh të gjera në rrjetet sociale.

Kjo ngjarje e papritur i ka dhënë një tjetër dimension koncertit të “Coldplay”, duke rikthyer vëmendjen jo vetëm te muzika, por edhe te jetët personale të figurave publike të përfshira në skandalin e paparashikuar.