Kajro, Egjipt – Të paktën 14 persona kanë mbetur të plagosur sot si pasojë e një zjarri që përfshiu një ndërtesë të telekomunikacionit në qendër të kryeqytetit egjiptian. Lajmi u konfirmua nga Ministria e Shëndetësisë së Egjiptit, ndërsa autoritetet sqaruan se zjarri tashmë është vënë nën kontroll.

Incidenti ndodhi në katin e shtatë të Qendrës së Thirrjeve Ramses, një objekt që i përket Kompanisë Egjiptiane të Telekomunikacionit, e njohur si Telecom Egypt. Sipas Autoritetit Kombëtar Rregullator të Telekomunikacionit, flakët shpërthyen në sallën e operacioneve dhe në qendrën e kontrollit, duke shkaktuar ndërprerje të përkohshme të shërbimeve të telefonisë dhe internetit në disa zona të vendit.

Për shkak të emergjencës, furnizimi me energji elektrike në ndërtesën dhjetëkatëshe u ndërpre, ndërkohë që autoritetet siguruan se shërbimet do të rikthehen brenda pak orësh.

Mediat vendase publikuan pamje ku një re e dendur tymi shihjej duke u ngritur mbi lagjen Ramses, një zonë e populluar dhe me rëndësi strategjike për infrastrukturën telekomunikuese të Egjiptit. Agjencia shtetërore e lajmeve MENA raportoi se flakët u izoluan në kohë, duke shmangur përhapjen e tyre në pjesë të tjera të ndërtesës apo në objektet përreth.

Burime nga policia thanë se hetimet paraprake sugjerojnë si shkak të mundshëm të zjarrit një qark të shkurtër elektrik. Ndërtesa në fjalë ka shërbyer më herët edhe si seli e Ministrisë së Telekomunikacionit.

Shërbimet e emergjencës dhe ekipet e zjarrfikësve vazhdojnë të monitorojnë situatën në terren, ndërsa pritet një raport i detajuar teknik mbi dëmet dhe shkaqet përfundimtare të incidentit.