Presidentja e Kosovës, Vjosa Osmani, ka përshëndetur hapjen e pesë kapitujve të fundit të negociatave mes Shqipërisë dhe Bashkimit Evropian, duke e cilësuar këtë zhvillim si një moment historik jo vetëm për vendin, por për mbarë rajonin.
Në një postim në rrjetet sociale, Osmani uroi Presidentin Bajram Begaj, Kryeministrin Edi Rama dhe të gjithë qytetarët shqiptarë për arritjen e rëndësishme, duke theksuar se progresi i Shqipërisë drejt integrimit është një fitore e përbashkët.
“Urime Presidentit Bajram Begaj, Kryeministrit Edi Rama dhe qytetarëve të Shqipërisë për hapjen e pesë kapitujve të fundit të negociatave me BE-në, një hap historik që dëshmon angazhimin e jashtëzakonshëm të Shqipërisë drejt integrimit evropian,” shkruan Osmani.
Ajo shtoi se ky progres e afron më shumë të gjithë rajonin me Bashkimin Evropian, ndërsa qytetarët e Kosovës, sipas saj, e ndajnë të njëjtin gëzim.
“Qytetarët e Kosovës festojnë sot bashkë me ju, teksa vazhdojmë të punojmë pandalur për të çuar përpara rrugën tonë drejt BE-së,” theksoi Presidentja e Kosovës.
Hapja e kapitujve të fundit konsiderohet një nga fazat më të rëndësishme të procesit negociues, duke shënuar avancimin e Shqipërisë drejt përfundimit të negociatave dhe anëtarësimit të plotë në Bashkimin Evropian.
