Qyteti i Vlorës u zgjua i përmbytur pasi moti i keq dhe reshjet intensive të shiut shkaktuan dëme të mëdha. Situata më alarmante ishte në disa lagje ku përmbytjet detyruan evakuimin e 33 familjeve, të cilat kaluan natën në konvikte të siguruara nga Bashkia e Vlorës. Në total, 55 persona u zhvendosën nga shtëpitë e tyre për shkak të përmbytjeve.

Lagjet më të prekura përfshijnë “Albano dhe Romina”, “Leg Sallat”, “28 Nëntori”, si dhe zona te Xhamia, “Kushtrim”, “Rilindja”, “Skela”, “Pavarësia”, rruga “Hasan Kushta”, dhe rruga “Gjergj Araniti”. Përmbytjet preken gjithashtu edhe rrugët afër Kishës Ortodokse, bibliotekës publike dhe bulevardit “Ismail Qemali”. Ende nuk ka një vlerësim të plotë për dëmet e shkaktuara në biznese dhe banesa, por autoritetet lokale pritet të fillojnë analizën dhe vlerësimin e situatës.

Një nga faktorët kryesorë që përkeqësoi situatën ishte çarja e kanalit të ujërave të larta, e cila shkaktoi vërshimin e ujit në qytet, duke mbuluar rrugët dhe lagjet kryesore. Niveli i ujit arriti deri në 50-60 cm, ndërsa rrjedha e fuqishme mori me vete objekte si karrige, tavolina dhe kosha mbeturinash, të cilët u spostuan deri në sheshin e Flamurit.

Për të përballuar emergjencën, në ndihmë të bashkisë erdhën Agjencia Kombëtare e Mbrojtjes Civile dhe Forcat e Armatosura, të cilët dërguan 2 moto varka, 2 ekipe të pajisura me motopompa, 8 mjete të kalueshmërisë së lartë dhe 30 forca ushtarake. Reshjet u ndalën rreth orës 19:00, por deri në atë moment, sasia e shiut ishte sa prurjet e shirave për të gjithë sezonin vjeshtë-dimër në Vlorë.