Autoriteti Portual i Vlorës ka njoftuar sot se për shkak të përkeqësimit të motit, do të ndalohet lundrimi i mjeteve të vogla lundruese dhe atyre të peshkimit nga data 23 mars deri më 25 mars.

Po ashtu, anijet e transportit ndërkombëtar për pasagjerë dhe automjete në linjën Vlorë-Brindisi-Vlorë nuk do të operojnë deri në përmirësimin e kushteve atmosferike.

Sipas njoftimit, gjatë këtyre ditëve në gji dhe det të hapur, era do të fryjë me shpejtësi 25-40 m/s, ndërsa lartësia e dallgëve do të arrijë deri në 4.5 metra.

Masat e marra:

Nga ora 06:00 e datës 23 mars ndalohet lundrimi i mjeteve të vogla lundruese dhe anijeve të peshkimit në det të hapur.

Operatorët detarë duhet të marrin masa për sigurimin e mjeteve në port dhe gatishmërinë e ekuipazheve.

Udhëtimet ndërkombëtare në linjën Vlorë-Brindisi-Vlorë janë pezulluar deri pas orës 22:00 të datës 24 mars.

Përmirësimi i kushteve pritet të ndodhë pas orës 08:00 të datës 25 mars.

Autoritetet bëjnë thirrje për kujdes të shtuar dhe respektim të masave, për të shmangur çdo situatë të rrezikshme në det.