Largimi i Shkollës “Tregëtare” drejt objektit të ri që po ndërtohet tek Shkolla “Industriale” ka ndezur alarmin tek qytetarët dhe historianët. Sipas zërave që qarkullojnë, hapja e këtij objekti lë rrugë për “miqtë oligark” që të marrin objektin e vjetër dhe të ndërtojnë aty pallate dhe hotele.

Shkolla, e themeluar nga Kryeministri Fan Noli në nëntor 1924, ka një histori 102-vjeçare dhe është një nga institucionet më të rëndësishme arsimore të qytetit të Vlorës. Për një shekull, aty kanë studiuar figura të shquara kombëtare.

Qytetarët tashmë kanë nisur mobilizimin: një peticion për mbrojtjen e objektit historik dhe për shmangien e çdo privatizimi apo ndërtimi mbi të. Idetë që qarkullojnë përfshijnë shndërrimin e tij në një muze apo një objekt në shërbim të qytetit dhe historisë.

Ky vendim për zhvendosjen e shkollës vjen pak muaj pas festimeve të 100-vjetorit të institucionit, më 8 nëntor 2024, dhe sipas kritikëve, është pjesë e një tendence më të gjerë për të ndryshuar peizazhin historik dhe arsimor të Vlorës, me ndikimin e oligarkëve dhe mbështetjen e Bashkisë dhe qeverisë.

Qytetarët e interesuar për të mbrojtur trashëgiminë historike të Shkollës “Tregëtare” janë ftuar të bashkohen në këtë iniciativë, ndërsa nga e hëna pritet të fillojnë veprimet konkrete për sensibilizimin dhe mbrojtjen e objektit.