Një 33-vjeçar, i dënuar më parë për vjedhje, ka rënë në prangat e Policisë së Vlorës, pasi dyshohet se është autor i vjedhjes së dy minimarketeve në qytet.

Specialistët për Hetimin e Krimeve në Komisariatin e Policisë Vlorë, në vijim të punës për zbardhjen e rasteve të vjedhjes dhe identifikimin e autorëve, kanë organizuar dhe finalizuar operacionin policor të koduar “Again”, bazuar në informacionet e siguruara nga puna hetimore dhe gjurmuese.

Në kuadër të këtij operacioni u bë kapja dhe ndalimi i një shtetasi 33 vjeç, banues në lagjen “Rilindja”, Vlorë, i dyshuar për veprën penale “Vjedhja”.

Nga hetimet ka rezultuar se ky shtetas dyshohet se më datë 29 janar 2026, në lagjen “Pavarësia 2”, dhe më datë 31 janar 2026, në lagjen “Isa Boletini”, ka vjedhur shuma parash dhe steka cigaresh në dy subjekte tregtare (minimarkete).

Policia bën me dije se vijon puna në bashkëpunim me Prokurorinë për zbardhjen dhe dokumentimin ligjor edhe të disa rasteve të tjera të dyshuara, që mund të jenë kryer nga i njëjti autor.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.