Për herë të parë në historinë e zgjedhjeve në Shqipëri, emigrantët do të kenë mundësinë të votojnë për Kuvendin e Shqipërisë në zgjedhjet e 11 majit 2025. Ky proces i ri do të sjellë kosto shtesë për partitë politike dhe Komisionin Qendror të Zgjedhjeve (KQZ).

Partitë politike do të përfitojnë një shtesë prej 20 milionë lekësh për fushatën zgjedhore jashtë vendit, duke e çuar në një total prej 150 milionë lekësh të dedikuara për këtë proces. Shkak për këtë shtesë është bërë fushata për emigrantët, të cilët do të votojnë për herë të parë në zgjedhjet e majit të ardhshëm. Formula për shpërndarjen e fondeve do të përcaktohet nga Komisioni Qendror i Zgjedhjeve, sipas numrit të votave që ka siguruar secila parti në zgjedhjet e kaluara.

Përveç kësaj, qeveria miratoi një shtesë prej 20 milionë eurosh, e cila do t’i kalojë KQZ për të mbuluar koston e dërgesës së fletëve të votimit dhe kthimin e tyre nga emigrantët. Ky fond do të sigurojë pagesën e dërgimit të fletëve të votimit në adresat e zgjedhësve jashtë vendit dhe mundësinë e rikthimit të tyre përmes shërbimeve postare.

Këto masa janë të nevojshme për të garantuar një proces zgjedhor të suksesshëm për emigrantët, që është një hap i rëndësishëm në përfshirjen e diasporës në jetën politike të Shqipërisë.