Janë zbardhur detaje të reja në lidhje me 35-vjeçarin Alfons Ndoci, i cili ndërroi jetë sot në burgun e Koridhalos në Greqi. Ndoci, i njohur si një person me rrezikshmëri të lartë, ishte i dënuar për vrasje.

Në vitin 2014, gjatë një grabitjeje në një dyqan në Elefsina, ai vrau pronarin, të cilin e ekzekutoi me gjakftohtësi sepse guxoi t’i rezistonte gjatë grabitjes. Në vitin 2018, ai u arratis nga mjeti i transportit të të burgosurve së bashku me tre të burgosur të tjerë. Ngjarja ndodhi në portin e Pireut, ku po kryhej transferimi i 11 të burgosurve nga Athina në Kretë. Pak ditë më pas, Ndoci u arrestua përsëri pas një operacioni të forcave speciale greke.

Në qershor të vitit 2023, ai u arrestua së bashku me shtetasin Gerald Jaho, pasi u kapën me dy pistoleta, marijuanë, 16,207 euro dhe kartëmonedha të tjera të shteteve të ndryshme, gjatë një ndjekjeje policore në Athinë. Ata u pikasën në një qendër tregtare nga biznesmeni Tonin Preka, i cili i kishte identifikuar si personat që i kishin grabitur 40,000 euro në Mykonos. Policia mbërriti në vendngjarje dhe kreu një ndjekje të episodike, ku Ndoci hipi në një automjet për të shpëtuar dhe përplasi disa mjete derisa u kap. Ndaj Ndocit kishte urdhër arresti në fuqi për “grabitje në bashkëpunim” dhe dy dënime me gjithsej tre vjet burg për “armëmbajtje nga një i burgosur” dhe “vjedhje”.

Ndoci u vra sot pas një sherri me thika në sektorin nr. 4 të burgut, ku mbahen të dënuar për vepra të rënda penale. Paraprakisht, bëhet fjalë për një përleshje të dhunshme mes të burgosurish shqiptarë, nga e cila mbeti i plagosur edhe Altin Vokrri, 46 vjeç, nga Gjakova e Kosovës. Forca të shumta policore kanë mbërritur në burgun e Koridhalos për normalizimin e situatës ndërkohë që kanë nisur hetimet për ngjarjen e rëndë.