Një tjetër akt dhune e rëndë tronditi Meksikën, kur kryebashkiaku i Tancawich, Jesus Eduardo Franco, u vra të dielën në rrethana ende të paqarta. Trupi i tij dhe ato të tre personave të tjerë u gjetën brenda një automjeti në qytet, sipas prokurorisë lokale që ka nisur hetimet.

Ngjarja u konfirmua nga Rita Rodríguez, presidente e degës shtetërore të partisë në pushtet, MORENA, në San Luis Potosí. Në një reagim përmes rrjetit social X, ajo shprehu dhimbjen për humbjen dhe bëri thirrje për drejtësi:

“Jemi thellësisht të pikëlluar nga vdekja e kolegut tonë Eduardo Franco. Ne kërkojmë nga autoritetet që të zbulojnë dhe ndëshkojnë përgjegjësit e këtij akti të rëndë.”

Vitet e fundit, kryebashkiakët dhe zyrtarët lokalë në Meksikë kanë qenë shpesh objekt sulmesh nga grupet e krimit të organizuar, që përpiqen të ushtrojnë ndikim mbi strukturat vendore. Shteti San Luis Potosí nuk ka qenë imun ndaj kësaj vale dhune, e cila shpesh ka lidhje me trafikimin e drogës dhe luftën për territor midis karteleve.

Një rast tjetër i ngjashëm ishte vrasja e Alejandro Arcos, kryebashkiaku i Chilpancingo në shtetin Guerrero, që tronditi thellë opinionin publik. Situata vazhdon të përkeqësohet, ndërsa presioni mbi autoritetet për të ndaluar valën e krimeve po rritet gjithnjë e më shumë.

Autoritetet lokale nuk kanë dhënë ende detaje mbi motivet apo përgjegjësit e këtij krimi, ndërkohë që hetimet vazhdojnë.