Kastriot Cenko, 39 vjeç, ka vrare bashkëshorten e tij, Alba Cenkon, disa ditë më parë në lagjen Ampelokipi të Athinës. Çifti jetonte bashkë me dy fëmijët e tyre. Gazetari shqiptar në Greqi, Edmont Guri, i cili ka raportuar për ngjarjen, ka deklaruar në një intervistë se kjo vrasje ka tronditur opinionin publik, veçanërisht komunitetin shqiptar në Greqi.

Guri shpjegoi se policia e cila mbërriti në vendngjarje pas njoftimit të bërë nga vetë autori i krimit, konstatoi se nuk bëhej fjalë për një vrasje të çastit. Sipas tij, autoritetet e kuptuan menjëherë që ky ishte një krim i planifikuar. Ai shtoi se kur policia hyri në banesë, gjetën shenja që treguan se vrasja ishte bërë me qëllim dhe jo në një moment të gjaknxehtësi.

“U duk qartë që në momentet e para kur u lajmërua që nuk është thjesht një vrasje, ka diçka më shumë. Ndërkohë që policia mbërriti në vendngjarje, kur hynë në banesë konstatuan disa shenja që tregonin se nuk ishte thjesht një vrasje në gjaknxehtësi e sipër, por i bëri të dyshonin dhe të thërrisnin menjëherë ekipin e kriminalistikës,” ka thënë Guri.

Ai ka zbuluar se autorit të krimit i është vërtetuar se jo vetëm që ka ekzekutuar bashkëshorten me një çekiç, por ka tentuar edhe ta copëtojë atë me mjete të tjera. Policia ka gjetur shumë qese të zeza në papafingo, ku Cenko ka tentuar disa herë të largonte trupin nga banesa për të fshirë gjurmët e krimit.