Një krim i rëndë ka tronditur qytetin e Durrësit mbrëmjen e së martës. Valbon Beqiraj, 51 vjeç, i njohur edhe si Marko Beqiraj, u gjet i pajetë në banesën e tij në lagjen nr. 12, me shenja dhune dhe plagë të shumta të shkaktuara nga mjet prerës.

Trupi i viktimës u zbulua nga nipi i tij, i cili i alarmuar njoftoi menjëherë Policinë. Burime nga ekspertiza mjeko-ligjore konfirmojnë se plagët e marra dyshohet të jenë shkaktuar nga goditje me thikë, duke i marrë jetën 51-vjeçarit, i cili lë pas gruan dhe një djalë 12-vjeçar.

Hetimet kanë hyrë në një fazë intensive. Policia ka shoqëruar disa banorë të pallatit ku ndodhi ngjarja, ndërsa kamerat e sigurisë në zonë janë sekuestruar dhe kanë ndihmuar në identifikimin e autorit të dyshuar, i cili tashmë po kërkohet me forcë nga uniformat blu.

Gjurmë gjaku të gjetura në vendngjarje, të ndryshme nga ato të viktimës, po analizohen përmes ekspertizës së ADN-së, për të zbuluar nëse në krim ka qenë i përfshirë edhe më shumë se një person.

Ndërkohë që rrethanat dhe motivi i vrasjes mbeten ende të paqarta, Policia dhe Prokuroria e Durrësit po punojnë për të zbardhur deri në detaj këtë ngjarje të rëndë që ka tronditur opinionin publik. Në orët në vijim pritet një deklaratë zyrtare mbi ecurinë e hetimeve.