Elias Rodriguez, 30-vjeçari nga Çikago, i akuzuar për vrasjen e dy punonjësve të ambasadës izraelite në Uashington, po përballet me dënimin me vdekje. Lajmi u bë i ditur nga prokurorja e përgjithshme në detyrë të kryeqytetit amerikan, Jeanine Pirro, gjatë një konference për shtyp lidhur me sulmin tragjik.

Sipas saj, ngjarja që ndodhi të mërkurën në mbrëmje po hetohet si krim urrejtjeje, ndërsa pritet të ngrihen akuza shtesë ndaj Rodriguez. “Ky është një rast që mund të dënohet me vdekje,” deklaroi Pirro, duke theksuar se është ende herët për të përcaktuar nëse prokuroria do të kërkojë këtë masë maksimale.

Nga ana e saj, FBI-ja në Uashington e ka cilësuar sulmin si “akt terrori dhe dhune të drejtuar kundër komunitetit hebraik”, duke i dhënë rëndësi dimensionit me motiv fetar të ngjarjes.

Departamenti Amerikan i Drejtësisë ka ngritur ndaj Rodriguez dy akuza për vrasje të shkallës së parë, si dhe akuza të tjera përfshirë vrasjen e zyrtarëve të huaj.

Ngjarja ndodhi jashtë Muzeut Hebraik të Kryeqytetit në orën 21:08 të mërkurën, ku dy viktimat, Yaron Lischinsky dhe Sarah Lynn Milgrim, u qëlluan për vdekje nga sulmuesi që hapi zjarr ndaj një grupi prej katër personash që po dilnin nga eventi.

Hetimet vijojnë ndërsa komuniteti hebraik dhe autoritetet amerikane mbeten në gatishmëri ndaj kësaj ngjarjeje me pasoja të rënda.