I moshuari do njihet sot me masën e sigurisë. Teksa gazetarët ndodheshin në sallë, ai mbuloi kokën me duar të mos e filmonin kamerat.

Ngjarja e rëndë ndodhi në një fshat të Maliqit të premten e 17 shkurtit. Viktima, 50-vjeçari Hamdi Bylykbashi, në gjendje të dehur u konfliktua me të atit dhe tentoi t’a hedhë në pusin e ujit në oborr.

Në këto kushte, për vetëmbrojtje, i moshuari e ka goditur disa herë në kohë të birin me një çekiç që përdoret për të thyer gurë.

Viktima ishte i divorcuar nga bashkëshortja dhe jetonte jashtë vendit. Ai kishte disa muaj që ishte kthyer nga Franca. Për shkak të divorcit, 50-vjeçari kishte nisur të konsumonte alkool çdo ditë.

Ndërsa dita e premte, 17 shkurt, ka qenë fatale për të, pasi është konfliktuar me babain duke tentuar ta shtyjë në pus, ndërsa babai i është kthyer duke e goditur me çekiç.

Ndërkohë që familjarët, në polici kanë dhënë deklarime të rreme, ku kanë thënë fillimisht se viktima ishte rrëzuar aksidentalisht dhe ishte dëmtuar në kokë.

Pas hetimeve, policia vuri në pranga të moshuarin. Shefki Bylykbashi akuzohet për veprën penale “Vrasja për shkak të marrëdhënieve familjare”, pasi i mori jetën të birit nga goditjet me sende të forta.