Një ngjarje e rëndë ka tronditur mbrëmjen e djeshme komunitetin sportiv turk, pasi presidenti i Klubit Sportiv Alemdağ, Tuncay Meriç, humbi jetën në një atentat me armë zjarri në lagjen Çekmeköy të Stambollit.

Sipas mediave turke, ngjarja ndodhi rreth orës 21:00, në një restorant në rrugën Tolgahan, në lagjen Güngören. Tuncay Meriç, 49 vjeç, po drekonte kur një person ende i paidentifikuar hyri brenda dhe e qëlloi me armë zjarri në kokë.

Pamjet e sigurisë, të publikuara nga mediat lokale, tregojnë momentin dramatik të sulmit dhe panikun e klientëve që u larguan me shpejtësi nga vendngjarja. Meriç u dërgua menjëherë në spital, por pavarësisht përpjekjeve të mjekëve, nuk mundi të mbijetonte.

Hetimet e para sugjerojnë se motivi i vrasjes mund të lidhet me çështje borxhi. Policia e Stambollit ka nisur një operacion të gjerë për identifikimin dhe kapjen e autorit, i cili aktualisht ndodhet ende në arrati.

Ngjarja ka shkaktuar tronditje të madhe në botën e sportit turk, ku Tuncay Meriç njihej si një figurë e respektuar dhe e përkushtuar për zhvillimin e klubit të tij.

Hetimet pritet të zbardhin detaje të tjera mbi motivet dhe autorët e kësaj vrasjeje tronditëse.