WhatsApp ka njoftuar se do të ndalojë mbështetjen për dhjetëra modele smartphone duke filluar nga 1 janari 2025. Kjo masë është pjesë e përpjekjeve të platformës, e cila është në pronësi të Meta, për të hequr dorë nga versionet e vjetëruara të sistemeve operative Android dhe iOS që nuk mbështeten më me përditësime sigurie.

Modelet e telefonave që do të ndalojnë mbështetje përfshijnë ato që përdorin sisteme operative të vjetruara, të cilat nuk mund të përditësohen më dhe janë të prirura ndaj kërcënimeve të mundshme kibernetike. Për Android, do të jetë e pamundur të përdorni WhatsApp në versionet më të vjetra të sistemit operativ, duke përfshirë disa modele si Samsung Galaxy S3, Galaxy Note II, Galaxy Ace 3 dhe Galaxy S4 Mini. Nga ana tjetër, për iOS, WhatsApp do të mbështesë vetëm versionet 15.1 dhe më të reja, duke përjashtuar modelet iPhone 5s, iPhone 6 dhe iPhone 6 Plus pas muajit maj 2025.

Kjo është një lëvizje për të siguruar që përdoruesit të kenë pajisje të pajtueshme me teknologjitë më të fundit të enkriptimit dhe sigurisë që integron WhatsApp, duke i mbajtur ata të mbrojtur nga rreziqe të mundshme.

Në ndërkohë, WhatsApp ka prezantuar disa opsione festive për Krishtlindje, duke shtuar emoticons dhe reagime të reja si konfeti dhe transmetues, që do të jenë të disponueshme në katalogun tradicional të emoticons të aplikacionit.