Xhovana Nikolli, e dashura e Amarildo Nikolli (i njohur si Xhanej), i cili ndodhet në burg i akuzuar si vrasës me pagesë, ka ndarë së fundmi një video ku pretendon se është kërcënuar nga i penduari i drejtësisë, Nuredin Dumani. Në rrjetin social “TikTok,” Xhovana ka postuar disa mesazhe kërcënuese dhe një mesazh zanor, për të cilin pretendon se është zëri i Dumanit. Në regjistrimin audio, dëgjohet një person që përdor gjuhë fyese dhe kërcënon rëndë të renë. E motra e Xhovanës, Alda Nikolli, i përgjigjet me sfidë kërcënimeve.

Xhovana dhe Alda kishin dy muaj që banonin në një apartament në Elbasan, ku ndodhi një shpërthim me tritol në korridorin e katit të katërt të pallatit në lagjen “Haxhias.” Pas shpërthimit, ku mbeti i plagosur rëndë një 26-vjeçar, Enea Themollari, Xhovana akuzoi Nuredin Dumanin si autor të vendosjes së eksplozivit. Dumani njihet si rival i partnerit të saj, Amarildo Nikolli. Ndërkohë, SPAK është duke hetuar shpërthimin dhe dosjen e Dumanit, pasi motrat Nikolli kanë ngritur akuza të drejtpërdrejta ndaj tij, duke përfshirë dhe një romancë që Alda kishte nisur me të penduarin e drejtësisë.