Sikur të mos mjaftonin bombardimet e vazhdueshme dhe tensionet e shkaktuara nga sulmet ruse, rajoni i Zaporizhias në Ukrainën juglindore po përballet me një tjetër sfidë: një pushtim masiv karkalecash.

Fshati Malokaterynivka, që bën pjesë në komunitetin Kushuhum, është ndër më të prekurit nga kjo dukuri e pazakontë për zonën. Sipas autoriteteve vendase, temperaturat ekstreme të ditëve të fundit kanë detyruar tufat e karkalecave të braktisin habitatet natyrore dhe të zbresin drejt zonave të banuara, kryesisht në kërkim të lagështisë dhe bimësisë në kopshte e fusha.

Zaporizhia është një rajon strategjik për shkak të centralit bërthamor më të madh në Evropë, i cili prej muajsh është kthyer në një pikë nevralgjike negociatash mes Kievit, Moskës dhe Uashingtonit. Tani, përveç rrezikut bërthamor dhe ushtarak, banorët po përballen edhe me këtë emergjencë natyrore.

Ekspertët sqarojnë se ky fenomen është i përkohshëm dhe do të zvogëlohet me rënien e temperaturave, kur karkalecat pritet të zhvendosen drejt rezervuarit të Kakhovkës.

Ndërkohë, Këshilli i fshatit ka deklaruar se situata është nën vëzhgim dhe se po hartohet një plan ndërhyrjeje, për të mbrojtur të mbjellat dhe për të shmangur dëme të mëtejshme në bujqësi.

Në një vend ku lufta ka bërë normalitetin të duket luks, pushtimi i karkalecave është një tjetër kujtesë se sfidat për popullsinë civile nuk vijnë vetëm nga armët.