Janë zbardhur emrat e tre autorëve të atentatit që ndodhi mbrëmjen e djeshme në fshatin Rrilë të Lezhës, ku shënjestër dyshohet të ketë qenë 21-vjeçari Merando Nikulaj, ndërsa pronari i berberhanes, Sokol Daci, mbeti i plagosur.

Sipas burimeve, autorët janë identifikuar si Gerardo Ndoka, Eliseo Ndoka dhe Kevin Ndoka. Mësohet se Merando Nikulaj dhe kushëriri i tij kanë pasur një konflikt gjatë verës me djemtë e fisit Ndoka pranë zonës së plazhit ku ata zotërojnë një hotel. Incidenti kishte degraduar në përplasje fizike me motorë, shkopinj bejsbolli dhe sende të tjera të forta, për të cilin Nikulaj është përballur më parë edhe me gjykatën.

Policia njoftoi se është ndaluar edhe efektivi Besart Kovaçi, 24 vjeç, i dyshuar për veprën penale “Shpërdorimi i detyrës”, pasi iu është përgjigjur me armë autorëve.

Nga hetimet e deritanishme ka rezultuar se si të dyshuar në ngjarje janë përfshirë Gerardo Ndoka, Eliseo Ndoka, Kevin Ndoka dhe Merando Nikulaj, të cilët janë shpallur në kërkim për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit, municionit dhe lëndëve shpërthyese”.

Policia vazhdon operacionet për kapjen e të dyshuarve dhe zbardhjen e plotë të rrethanave të ngjarjes.