Dëshmia e Aleksandër Krrashit, shoferit 24-vjeçar të betonierës që u përplas me automjetin Mercedes Benz, ku ndodheshin 4 të rinjtë që humbën jetën, është zbardhur nga hetuesit. Shoferi ka deklaruar se sapo ka hyrë në rrugën kryesore, makina e tij ka ndaluar për shkak se i kishte mbaruar nafta.

Në dëshminë e tij, ai ka thënë se ka provuar ta ndezë dy herë makinën, dhe më pas ka shkuar në një karburant aty pranë për të marrë naftë. Sipas tij, ai ka harruar të ndezë bllokazhin e betonierës, një gabim që mund të ketë kontribuar në aksidentin fatal.

Gjithashtu, mësohet se në dëshminë e parë, shoferi ka thënë se makina ishte në lëvizje, por më vonë ka ndryshuar versionin e tij, duke pranuar se ajo ishte ndalur për shkak të mungesës së naftës. Ka dyshime gjithashtu se betonieria mund të ketë pasur një prishje dhe më pas është fikur, ndërkohë që 24-vjeçari nuk ka ndezur bllokazhin e mjetit dhe as ka vendosur trekëndëshin paralajmërues, që përdoret në rast defektesh për të paralajmëruar kalimtarët dhe automjetet e tjera.