Janë zbardhur detaje të reja rreth krimit të rëndë që ndodhi në orët e para të mëngjesit në një azil privat për të moshuarit në zonën e Ali Demit. Ngjarja ka ndodhur rreth orës 04:00, ku një 78-vjeçar goditi për vdekje shokun e tij të dhomës.

Prsoni që ka ndërruar jetë është 82-vjeçari Virxhil Vesho, ndërsa autori i ngjarjes është Zyhdi Shehu, 78 vjeç. Mësohet se të dy të moshuarit vuanin nga skleroza.

Policia e Tiranës ka arrestuar në flagrancë Zyhdi Shehun për veprën penale “Vrasja me dashje”, parashikuar nga neni 76 i Kodit Penal. Sipas hetimeve paraprake, konflikti mes dy të moshuarve ka nisur për motive të dobëta, konkretisht për një debat lidhur me krevatin. Zyhdi Shehu dyshohet se ka goditur disa herë me bastun (shkop hekuri) Virxhil Veshon, i cili, si pasojë e dëmtimeve të marra, ka humbur jetën.

Materialet e këtij rasti i janë kaluar Prokurorisë për veprime të mëtejshme. Ky incident tragjik nënvizon nevojën për kujdes të shtuar dhe monitorim më të mirë të të moshuarve në azile, veçanërisht të atyre që vuajnë nga sëmundje të tilla si skleroza, e cila mund të ndikojë në sjelljen dhe gjendjen emocionale të tyre.