Pas përfundimit të afatit të aplikimeve më 7 mars, është zbardhur lista e kandidatëve për anëtarë të Këshillit Drejtues të Radio Televizionit Shqiptar (RTSH). Në total, 68 kandidatë do të garojnë për 11 vendet në këtë bord, pas shkarkimit të këshillit të mëparshëm nga Parlamenti për shkelje të procedurave dhe konflikt interesi.

Sipas raportimeve, kandidatët do të kalojnë përmes një procesi dëgjese në Komisionin e Medias. Në listë spikasin emra të njohur nga fusha e artit, kinematografisë dhe medias, mes të cilëve aktori Kastriot Çaushi, aktorja Rajmonda Bulku, kompozitori Osman Mula, regjisorët Besnik Bisha, Robert Budina dhe Arjan Çuliqi, aktorët Agim Bajko dhe Arben Derhemi, karikaturisti Bujar Kapexhiu, kompozitori Edmond Zhulali, si dhe gazetarët Rezear Xhaxhiu dhe Lorenc Vangjeli.

Ky proces vjen pas vendimit të Parlamentit më 17 shkurt për të shkarkuar 11 anëtarët e mëparshëm të Këshillit Drejtues, pas akuzave për parregullsi në përzgjedhjen e drejtorit të përgjithshëm të RTSH dhe të tjera shkelje që çuan në dyshime për shpërdorim detyre.

Deri më 4 mars, ishin dorëzuar 55 kandidatura, ndërsa në përfundim të afatit, numri i tyre arriti në 68. Procesi i përzgjedhjes së anëtarëve të rinj pritet të sjellë një reformim të menaxhimit dhe drejtimit të televizionit publik shqiptar.