Misteri rreth trupit të dekompozuar të gjetur pak ditë më parë në një fushë në Kolonjë vijon të thellohet, ndërsa autoritetet njoftojnë se kufoma do të dërgohet në Tiranë për ekspertizë mjeko-ligjore dhe analizë të ADN-së.

Sipas burimeve zyrtare, pritet që përmes ekspertizës antropologjike të përcaktohet mosha, gjinia dhe koha e saktë e vdekjes së viktimës, e cila mbetet ende e paidentifikuar. Trupi nuk mbante shenja dhune, çka ka bërë që policia të hedhë poshtë pistën e një vrasjeje, duke orientuar hetimin drejt një vdekjeje natyrale. Megjithatë, hetimet mbeten të hapura deri në konkluzionet përfundimtare.

Ajo që shton edhe më tej misterin është fakti se deri më tani nuk është paraqitur asnjë denoncim për person të zhdukur në zonë, duke e bërë identifikimin edhe më të vështirë.

Trupi u zbulua rastësisht nga një banor i zonës, i cili gjatë korrjes së grurit me autokombanjë, vuri re trupin e pajetë dhe njoftoi menjëherë autoritetet. Ndërkohë, ekspertët e kriminalistikës kanë kryer këqyrjen e vendngjarjes dhe kanë marrë mostra për analizat laboratorike.

Policia e Korçës vijon hetimet në bashkëpunim me Prokurorinë, ndërsa ADN-ja pritet të jetë çelësi për zbardhjen e identitetit të viktimës dhe rrethanave të vdekjes.