Kiev/Tallinn – Presidenti ukrainas, Volodymyr Zelensky, ka reaguar ashpër pas shkeljes së hapësirës ajrore të Estonisë nga tre avionë luftarakë rusë MiG-31, duke e cilësuar këtë veprim si një provokim të rrezikshëm dhe skandaloz nga Moska.

“Avionët luftarakë rusë shkelën përsëri hapësirën ajrore të NATO-s, këtë herë mbi Estoninë. Kjo është e papranueshme. Destabilizimi rus po zgjerohet në vende të reja dhe në drejtime të reja. Kjo është një fushatë sistematike që Rusia po zhvillon kundër Evropës, kundër NATO-s, kundër Perëndimit. Kjo kërkon një përgjigje sistematike,” tha Zelensky, duke bërë thirrje për masa të forta, si nga NATO ashtu edhe nga vendet individuale.

Incidenti, i cili zgjati 12 minuta, ka shtuar tensionet dhe është cilësuar nga NATO si “një shembull tjetër i sjelljes së pamatur të Rusisë”. Si përgjigje, aleanca ka nisur operacionin Sentinel East, me qëllim forcimin e patrullimeve në krahun lindor të NATO-s.

Reagime të forta kanë ardhur edhe nga liderët evropianë, përfshirë Ursula von der Leyen dhe kryeministren estoneze Kaja Kallas, të cilët kërkuan një përgjigje të vendosur dhe të bashkërenduar ndaj Moskës.

Ky incident vjen në një kohë të tensionuar për sigurinë në Evropën Lindore, duke rritur shqetësimet për veprime të mëtejshme destabilizuese nga Rusia.