Papa Françesku ka thënë se njerëzit që zgjedhin të kenë kafshë shtëpiake në vend të fëmijëve, kanë sjellje egoiste. Komentet e Papës erdhën teksa ai po diskutonte për prindërimin gjatë një auditori të përgjithshëm në Vatikan.

“Sot… ne shohim një formë egoizmi. Ne shohim që disa njerëz nuk duan të kenë fëmijë. Ndonjëherë ata bëjnë një dhe kaq, por kanë qen dhe mace që zënë vendin e fëmijëve. Kjo mund t’i bëjë njerëzit të qeshin, por është një realitet. Praktika është një mohim i atësisë dhe amësisë dhe na pakëson, na heq njerëzimin.” –tha Papa.

Papa Françesku tha se njerëzit që nuk janë në gjendje të kenë fëmijë për arsye biologjike duhet të mendojnë për birësimin, duke u bërë thirrje njerëzve të mos kenë frikë në fillimin e prindërimit. Ai foli gjithashtu për një “dimër demografik” – ndoshta duke iu referuar vendeve me lindje në rënie – ku sipas Papës “ne shohim se njerëzit nuk duan të kenë fëmijë, ose vetëm një dhe jo më shumë”.

Nuk është hera e parë që Papa Françesku vë në shënjestër njerëzit që zgjedhin kafshët shtëpiake në vend të fëmijëve. Në vitin 2014, ai tha se të kesh kafshë shtëpiake në vend të fëmijëve ishte “një fenomen tjetër i degradimit kulturor”.

Papa 85-vjeçar është fotografuar në të kaluarën duke përkëdhelur kafshë, duke filluar nga qentë tek panterat, por ai nuk mendohet të ketë një kafshë shtëpiake.