Ndërsa procesi i numërimit të votave preferenciale në Tiranë po i afrohet fundit, është bërë tashmë më e qartë panorama e përfaqësimit në legjislaturën e re, veçanërisht për kandidatët nga listat e hapura. Të dhënat aktuale flasin për zhvillime të rëndësishme si në kampin opozitar ashtu edhe në atë mazhoritar.

Tabaku e sigurt për mandatin demokrat në Tiranë

Nga Partia Demokratike, e cila pritet të marrë vetëm një mandat nga lista e Tiranës, Jorida Tabaku ka konsoliduar fitoren, duke e lënë pas ndjeshëm ndjekësin më të afërt, Ilir Alimehmetin.
• Jorida Tabaku: 18,850 vota
• Ilir Alimehmeti: 16,426 vota

Me një diferencë prej mbi 2,400 votash, dhe me pak vota të diasporës të mbetura për t’u numëruar, është e vështirë të ketë përmbysje.

Socialistët: Përplasje të forta për vendet e fundit në Kuvend

Nga lista e Partisë Socialiste, në Tiranë janë 7 kandidatë që kalojnë nga lista e hapur, por dy përplasje të ngushta po vendosin fatin e disa emrave të njohur:

1. Ornaldo Rakipi vs. Xhemal Qefalia
• Rakipi: 9,442 vota
• Qefalia: 9,400 vota
Diferenca: Vetëm 42 vota

Njëri prej tyre do të mbetet jashtë për shkak të kuotave gjinore, përveç nëse PS arrin të marrë 20 mandate në Tiranë me votat e diasporës, çka duket pak e mundur në këtë fazë.

2. Blerina Gjylameti vs. Olta Xhaçka
• Gjylameti: 5,715 vota
• Xhaçka: 5,691 vota
Diferenca: Vetëm 24 vota

Edhe në këtë rast, njëra nga dy gratë do të digjet për shkak të rregullit të përfaqësimit gjinor. Toni Gogu, i cili ka më shumë vota se të dyja (5,920), gjithashtu digjet për shkak të kuotës gjinore.

Votat e diasporës, vendimtare vetëm në kufij të ngushtë

Në të dyja rastet, votat e diasporës kanë ende potencial të ndikojnë rezultatin, por vetëm nëse diferencat janë mjaft të vogla, siç është rasti Gjylameti-Xhaçka ose Rakipi-Qefalia.

Pamja përfundimtare pritet të qartësohet brenda 24 orëve të ardhshme, kur të përfundojë plotësisht edhe numërimi i votave të ardhura nga jashtë vendit.