Në zgjedhjet e përgjithshme të 11 majit, Partia Demokratike për herë të katërt radhazi përfshiu në listat e saj kryetarët e partive aleate që pranuan koalicionin parazgjedhor. Forcat politike si Partia e Lirisë, Partia Republikane, PDIU, PBDNJ dhe PAA u integruan në listat e PD-së, duke garantuar përfaqësim në parlament.

Megjithatë, një analizë e rezultateve në qarkun e Tiranës tregon se disa nga këta aleatë kanë përfituar më shumë vende deputetësh sesa vetë PD-ja në koalicionin e djathtë.

Partia e Lirisë ka siguruar dy vende të sigurta në listën e Tiranës, ndërsa kryetari i saj, Ilir Meta, me mbi 7,000 vota të marra deri tani, ka ndikuar direkt në këtë sukses, edhe pse numërimi i plotë i kutive dhe zarfeve të diasporës vijon.

Ndërsa te PDIU, Mesila Doda u përfshi në listën e sigurt të demokratëve, kryetari Shpëtim Idrizi siguroi 1,786 vota në listën e hapur, duke kontribuar në sigurimin e një vendi tjetër deputeti.

Nga ana tjetër, disa kandidatë me mbështetje të konsiderueshme nga demokratët mbetën jashtë parlamentit, pavarësisht mijëra votave të marra. Ndër ta janë Ilir Alimehmeti me mbi 16,000 vota, Asllan Dogjani me 6,437 vota, Myslim Murrizi me 5,628 vota dhe Grigels Muçollari me 4,724 vota.

Kjo situatë evidenton rolin kyç të partive aleate në forcimin e pozicionit të koalicionit të djathtë në Tiranë, por nënvizon gjithashtu sfidat e kandidatëve brenda vetë listave të PD-së për të siguruar një vend në parlament.