Një numër gjithnjë e më i vogël votuesish po i drejtohet kutive të votimit, në atë që ekspertët e cilësojnë si një shenjë alarmi për demokracinë dhe pasojë e mungesës së thellë të besimit ndaj partive politike.

Në një ditë me reshje të dendura dhe rrugë të përmbytura, qytetarët e Vlorës pothuajse i bojkotuan zgjedhjet për kryetarin e ri të Bashkisë. Nga 171 mijë zgjedhës të regjistruar, në votime morën pjesë më pak se 20 mijë – vetëm 12.54 për qind, një shifër rekordisht e ulët që shënon minimum historik për qytetin bregdetar.

Pjesëmarrja ishte e ulët edhe në Berat, ku votuan vetëm 20 për qind e zgjedhësve, ndërsa në bashkitë më të vogla shifrat ishin disi më të larta: Cërrik 24.81%, Mat 39.23% dhe Tepelenë 34.63%.

Në të pesta bashkitë, kandidatët e Partisë Socialiste siguruan fitore të thella, me përqindje që variojnë nga 66 deri në 83 për qind, në një garë ku opozita e përçarë nuk arriti të mobilizojë elektoratin.

Kryeministri Edi Rama e justifikoi pjesëmarrjen e ulët me motin e keq dhe “natyrën e zgjedhjeve të pjesshme”, por sipas ekspertëve të shoqërisë civile, kjo është shenjë e apatizmit politik dhe humbjes së besimit të qytetarëve tek forcat tradicionale.

“Kur qytetarët ndihen të përjashtuar nga vendimmarrja dhe nuk shohin përfaqësim real, mungesa e pjesëmarrjes bëhet një formë proteste e heshtur,” vlerësoi një ekspert i Institutit për Studime Politike.

Rezultatet e zgjedhjeve të së dielës tregojnë një realitet ku fitoret politike po vijnë me gjithnjë e më pak vota, ndërsa indiferenca e qytetarëve rritet në përpjesëtim të drejtë me dominimin e njëanshëm të pushtetit vendor.