Gjatë interpelancës në Kuvend me ministren e Arsimit dhe Sportit, Ogerta Manastirliu, deputetja Ina Zhupa ngriti akuza të rënda ndaj ministres, duke e bërë përgjegjëse për vrasjen tragjike të Martin Canit pranë shkollës “Fan Noli” dhe për dështimet në menaxhimin e institucioneve publike gjatë drejtimit të saj.

Zhupa e akuzoi Manastirliun për mungesë përgjegjësie dhe veprime të pamjaftueshme për të siguruar sigurinë dhe mirëqenien në institucionet arsimore. Ajo theksoi se ministrja nuk kishte marrë masa për të përmirësuar buxhetin dhe kushtet në shkolla, duke dalë në pah vetëm kur u rrezikua pozicioni i saj.

Zhupa deklaroi:

“Nuk e kishte kuptuar akoma që ishte ministre e Arsimit. Nuk e kishim parë në asnjë shkollë, nuk e kishim parë të kërkonte më shumë buxhet për ministrinë e vet. Por kur ndodh një fatkeqësi, si ajo e vrasjes së Martin Canit, çdo njeri është fajtor përveç Ogerta Manastirliut.”

Deputetja e kritikoi edhe për mungesën e strukturave të sigurisë në shkolla, duke shtuar se sistemi patronazhist në drejtimin e institucioneve ka dështuar. Ajo përmendi se vetëm 27% e shkollave drejtohen nga persona të certifikuar, ndërsa të tjerët janë, sipas saj, individë të afërt me partinë në pushtet.

Lidhja me sistemin e shëndetësisë dhe tragjedia e Martin Canit

Zhupa akuzoi ministren edhe për ndryshimet që ajo kishte bërë në sistemin e urgjencës gjatë kohës kur drejtonte Ministrinë e Shëndetësisë. Ajo theksoi se këto ndryshime, që caktonin ditë të përcaktuara për spitale të ndryshme, ishin arsyeja pse Martin Cani nuk u dërgua tek QSUT, që ishte më afër, por tek Spitali Ushtarak, ku humbi jetën.

Zhupa shtoi:
“Ke ndryshuar një sistem ku nuk është prioritet jeta. Martin do të ishte gjallë nëse do çohej tek QSUT, por ti e detyrove të shkonte në spitalin ushtarak sepse ishte dita që i takonte.”

Deputetja përfundoi duke theksuar se përgjegjësitë për këtë tragjedi dhe për gjendjen e përgjithshme në arsim dhe shëndetësi bien mbi Manastirliun, duke i bërë thirrje që të marrë masa konkrete dhe të ndalë justifikimet.