Një zjarr ka shpërthyer mbrëmjen e sotme në fshatin Remanicë, në Njësinë Administrative Velabisht të Beratit. I favorizuar nga era, flakët përparuan me shpejtësi, duke rrezikuar përhapjen drejt një pylli me pisha. Menjëherë pas marrjes së njoftimit, shërbimet zjarrfikëse u nisën drejt zonës së zjarrit dhe arritën të vendosin situatën nën kontroll.

Forcat zjarrfikëse vepruan me shpejtësi, duke lokalizuar flakët dhe duke parandaluar përparimin e tyre drejt pyllit me pisha. Aktualisht, zjarrfikësit po monitorojnë vatrat e zjarrit për të mos lejuar riaktivizimin e tij. Si pasojë e zjarrit, është djegur një sipërfaqe prej 300 metër katrorësh me shkurre, ferra dhe bar të thatë.

Burimet zjarrfikëse në vendngjarje konfirmuan se zjarri ishte i qëllimshëm dhe po punohet nga ana e policisë për identifikimin dhe kapjen e autorëve.