Pas zjarrit të madh që përfshiu tregun e rrobave të përdorura në zonën e “5 Majit” në Tiranë, në vendngjarje ka mbërritur drejtori i zjarrfikëses së Tiranës, Shkëlqim Goxhaj, i cili bëri me dije se puna për parandalimin e përhapjes së flakëve vijon intensivisht.

“Puna jonë kryesore ka qenë që të izolojmë vatrën e zjarrit brenda objektit ku mendohet se ka nisur incidenti,” tha Goxhaj për mediat, duke theksuar bashkëpunimin me forcat e policisë dhe zjarrfikësit e Kamzës, Vorës dhe Elbasanit.

Ai shtoi se objektet përreth janë të sigurta, ndërsa rreziku i përhapjes ishte i lartë për shkak të materialeve të djegshme dhe çatisë së objektit:

“Ishte ora e parë që ne luftuam me të gjitha forcat për të parandaluar përhapjen. Materialet brenda objektit, komplet rroba dhe pajisje plastike, e bënin vatrën shumë të rrezikshme. Pas kësaj kaluam në planin e dytë dhe izoluam gjithë objektin, duke siguruar që zjarri mos të përhapet në objekte të tjera.”

Goxhaj falënderoi gjithashtu Policinë e Shtetit, policinë bashkiake dhe Ujësjellës Kanalizimet për furnizimin me ujë dhe mbështetjen e dhënë në menaxhimin e situatës.

Situata vijon të monitorohet nga zjarrfikësit dhe autoritetet lokale, ndërsa hetimet për shkakun e zjarrit janë në zhvillim nga oficerët e parandalimit në bashkëpunim me Policinë e Shtetit.