Një ngjarje tragjike ka ndodhur gjatë natës në spitalin Marienkrankenhaus në Hamburg të Gjermanisë, ku një zjarr i fuqishëm ka shkaktuar vdekjen e të paktën tre personave të moshuar, ndërsa rreth 50 të tjerë janë plagosur, tre prej tyre ndodhen në gjendje kritike për jetën.

Sipas njoftimit të policisë gjermane më 1 qershor, viktimat janë të moshës 84 deri në 87 vjeç, të gjithë pacientë të pavijonit të kujdesit për të moshuar.

Zjarrfikësit njoftuan se zjarri shpërtheu rreth mesnatës në katin e parë të ndërtesës, duke përfshirë shpejt ambientet ku ndodheshin pacientët me lëvizshmëri të kufizuar.

“Disa të moshuar u evakuuan përmes korridoreve të ndërtesës me vështirësi për shkak të problemeve të tyre të lëvizjes,” – deklaroi zëdhënësi i zjarrfikësve, Lorenz Hartmann.

Ekipet zjarrfikëse arritën të ndalojnë përhapjen e zjarrit përpara se të kërcënonte pjesën tjetër të spitalit, duke shmangur një katastrofë edhe më të madhe.

Autoritetet e policisë së Hamburgut kanë nisur një hetim të plotë për të përcaktuar shkaqet e zjarrit, ndërsa spitali ka aktivizuar protokollet emergjente për zhvendosjen dhe trajtimin e pacientëve të dëmtuar.

Ngjarja ka shkaktuar tronditje të madhe në opinionin publik gjerman dhe pritet që ditët në vijim të zbardhen më shumë detaje mbi shkaqet dhe përgjegjësitë e mundshme.