Zjarret e shumta në vend, ka bërë që Kontrolli i Lartë i Shtetit të nisë kontrollin në terren, ndaj strukturave që menaxhojnë shuarjen e zjarreve.
Inspektorët e KLSH-së do të jenë në të gjitha qytetet problematike ku ka zjarre, të cilat dyshohen edhe të qëllimshme, përfshirë Vlorën dhe Fierin ku situata paraqitet më e rëndë. Me urdhër të kryetarit Arben Shehu, kontrollet kanë nisur në të gjitha hallkat e strukturave të reagimit kundër zjarrit.
Kontrolli do të verifikoj menaxhimin që po bëhet për procesin e shuarjes së zjarreve, duke nisur që përdorimi i pajisjeve si dhe anën organizative.
KLSH gjithashtu do të verifikojë edhe tenderimet për pajisjet e zjarrfikësve si dhe hallkave të tjera të emergjencave civile, nëse përputhen fizikisht me ato që janë blerë si dhe mungesën e tyre gjatë operacioneve.
Aktualisht sipërfaqe të tëra janë duke u djegur në pika të ndryshme, ndërsa më problematike paraqitet situata në Karaburun ku zjarri po i afrohet parkut të Llogarasë si dhe vëndhedhja e mbeturinave në Fier.
