Situata e zjarreve në Gramsh po përkeqësohet nga ora në orë. Mësohet se flakët kanë përfshirë edhe fshatin Harunas, ku ndërhyrja e forcave të emergjencës është bërë e pamundur, pasi rruga është e bllokuar nga zjarri dhe rrezikohet jeta e ekipeve zjarrfikëse.

Deri më tani raportohet për gjashtë persona të plagosur si pasojë e zjarreve që kanë shkrumbuar zona të gjera të rrethit.

Më herët, Ministria e Mbrojtjes urdhëroi evakuimin e banorëve nga fshatrat Kullollas, Bletëz, Menkollar, Shimër, Skënderbegas, Spanesh dhe Kazie. Në Kullollas, një i moshuar rreth 80 vjeç humbi jetën pasi, sipas hetimeve paraprake, zjarri që kishte ndezur në kopshtin e banesës i doli jashtë kontrollit dhe ai u asfiksua. Flakët u përhapën me shpejtësi, duke prekur disa fshatra të tjerë.

Forcat zjarrfikëse dhe emergjencat civile ndodhen në gatishmëri të plotë, ndërsa situata mbetet kritike.