Një vatër zjarri është regjistruar sot rreth orës 11:20 në Mitropolinë Ortodokse të Gjirokastrës, në lagjen “Meçite”.

Falë ndërhyrjes së shpejtë të forcave zjarrfikëse, zjarri është izoluar dhe është parandaluar përhapja e tij në pjesët e tjera të ndërtesës, të cilat për shkak të konstruksionit prej druri rrezikonin të shkaktonin një zjarr masiv.

Nga flakët janë dëmtuar vendi i qirinjve, disa libra fetarë dhe hapësira e lutjeve.

Sipas informacioneve paraprake, shkaku i zjarrit dyshohet të ketë qenë lënia ndezur e qirinjve në zonën e lutjeve.

Autoritetet janë duke vijuar hetimet për të përcaktuar shkaqet e plota të incidentit dhe vlerësimin e dëmeve materiale.