Zjarri në qendrën tregtare “Metropol” në Lushnjë, fillimisht i lokalizuar në katin e dytë, të tretë dhe të katërt, ka përhapur flakët edhe në banesat mbi qendrën tregtare, e cila ndodhet në një pallat 12-katësh. Për shkak të vështirësive në menaxhimin e situatës nga forcat zjarrfikëse, është dërguar një helikopter për të ndihmuar në shuarjen e zjarrit.

Zjarrfikësit e Lushnjës kanë hasur sfida në përballjen me flakët, dhe për të ndihmuar në evakuimin e njerëzve nga katet e larta të godinës, është shfrytëzuar një vinç privat, pasi zjarrfikësja lokale nuk disponon autoshkallë. Shtëllunga e madhe e tymit shpërtheu nga të dyja godinat.

Gjithashtu, raportohet se për shkak të zjarrit janë shtruar në spital mbi 20 persona, ndërsa 25 të tjerë janë dërguar për ndihmë mjekësore në spitalin e Fierit. Gjendja e tyre është e qëndrueshme, por mbeten nën kujdesin e mjekëve. Në vendngjarje janë angazhuar 7 zjarrfikëse dhe 8 ambulanca. Situata është ende e pasigurt, dhe hetimet për shkakun dhe përmasat e zjarrit po vazhdojnë.